官場「梁天來」偉哥

蓮花地，怪現象，在官場，當局長，「打孖上」，當事人，認無樣，眾嘩然，難想像。

這趟「畸屎」，屬官場「冤案」?還是行政「新現象」，宜細細分析，皆因「出事」衙門，或當事人，近多年來，曾生冤案，衙門表現，亦是走樣，搞到對簿公堂，致退職「下場」，涉事衙門，近數月來，謠言四起，烏煙氣瘴! 引人注目，「八掛怪現象」!

話說呢單嘢，個主角叫「偉哥」，為人醒目，工作力強，最風光時，曾當署長，領軍數千，令行全埠，十分風光。

唯獨是，好景不常，「偉哥」「雖「勁」，上司卻「無良」，貪「陰司地」，搞到上公堂，本來，一人做事一人當，貪的是「大法師太」，責任則要下屬，「偉哥」孭上!

幸好蓮花地法界，眼睛仍是雪亮，打咗幾年官司，「嚇到魂飛魄散」，終於「打甩罪狀」，不幸之是，署長之位，已經被人當上，「偉哥」被投閒置散，失意官場，唯有暫休「養傷」!

終於，守得「雲開見月明」，一日，蓮花尊者，冊封「偉哥」為新任局長，專業雖然不對口，但見「冇咗隻雞」，「捉番隻狗」，反正局長俸祿，也算不俗，雖然該衙門，長期多穢事，名聲已甚響，勉強也要捱!

「偉哥」也算本事人，經過一年後，開山礕石，勵精圖治，終算將個「污名」衙門，洗番干淨個招牌，還略有建樹，頗獲稱讚。

可惜，蓮花祠堂，係個當風「神堂」，經常刮風，各路「天神」，經常「執位」!

最近，「欽天監」衙門又出事，「阿頭」暗然落台，但無人肯接任，更謠傳四起，話衙門內烏煙瘴氣，處事混亂，幫派林立，互相傾軋，仲亂過宋江坐陣深山果陣。

故此，蓮花尊者，食過番尋味，又搵「偉哥」「捱義氣」。

「偉哥」係「順德人」，又「咕」聲吞咗佢，但今次當「欽天監」阿頭，吾係「轉飯鑊」，而係「打孖上」，兩瓣都要做，但俸祿則好「奀」，只得「皮零嘢」，真係夠闊太去做一次「菲素」。簡直有D「刻薄」!

消息爆出，全埠嘩然，咁樣做法，枯勿論「偉哥」專業對口與否? 專業上有否問題? 就算專業技術性冇問題，咁樣捱法，想「做死人個仔咩」! 再者，「偉哥」空降新衙門，對原來係度「叫緊糊」班同僚，士氣會否打擊?

蓮花尊者又施出其一貫板斧，轉轉個肥膊頭，話呢隻「計仔」，係「半唐番」老爺諗嘅，吾關佢事，又一波，「舍」咗過隔離!

「半唐番」老爺則大讚「偉哥」了得，係「忠精」公樸，任命非佢莫屬，幾乎仲要獎過「牌坊」俾佢添!

無論如何，不管「偉哥」內心如何感受，從局外人看來，「偉哥」仕途，一再任人苦害，屢遭蒙冤，一再調動，整日當官場「消防員」，到處救火，也要甘之如飴，遭遇何其不幸，真個是「官場梁天來也!」

‧阿茂‧