袋住先

轎爺「炒冷飯」，話搞專車道，此議講多年，講極都唔見，舊事又重提，是否「大口仔」？

管轎老爺，日前似「做嘢」，話設「專車道」，讓巴士「紓展」。實現超半年，八月才可見。

俱俱專車線，講咗已多年，阿茂想當年，聽局長「高見」，話設公交道，讓巴士、的士，南北兩邊走，車速快如電。

阿茂信如真，誰知又被「滾」，呆等又多年，乜道都唔見，只係新馬路，弄條「怪雞線」，勞師又動眾，迫車繞大圈，得來之結果，專線之長度，不及半條街，行車之「省」時，只有幾秒鐘，這個「偉」成果，做薑唔夠辣，做醋更唔酸，產生反效果，附近之小道，塞車苦叫天。心水清者話，每逢節假日，新馬路交通，已經較暢通，何需搞專道？有如茂整餅，冇事搵嘢搞，大功小成果，劏雞用牛刀，作為似做「騷」！

如今搞「專道」，效果未知道，實現要八月，等候時咁長？原因難猜度，不過看歷史，當年轎老爺，豪言聲公報，要設公交車，專門行通道。講後無蹤影，多少年難數，不過轎老爺，豪言多滔滔，要訂車機制，衛星來訂位，巴士站之上，預告車快嚟……，大計滿天飛，現實少作為。

蟻民被騙多，謊言信唔過，因為轎衙門，自開檔以來，口水多過浪，講就天無敵，做則無能力，簡單做民調，投訴八萬份，老爺公信力，一文錢唔值，只能聽其言，細心觀其行，老爺之豪言，只能「袋住先」！

‧阿茂‧