大悲劇

世間有名言，只有生壞命，唔會改壞名。運建辦認真「混」建，建出近乎世界紀錄之「世紀工程」。無啦啦「建」多百幾億，銀両「倒」咗去，仲未見「黑洞」個底，啲蟻民正係心肝卜卜跳嗰陣，篤數公「忍頸」唔住，終於爆咗出嚟，蓮花地正上演緊離奇大悲劇？

篤數公鬧運建辦盤數認真混帳，最初遞條數出嚟，話只係洗四十幾億啫，點知洗洗吓，越洗越狼，洗咗七年，洗多咗成百幾億，博命倒銀両唔打緊。點知洗咗銀両都見唔倒乜野。

嗰條「飛天蛇」開工咗幾年，只係見幾條「雞腳」，拖拖拉拉。啲圓外收咗水，竟然連啲工人都唔見多一個，仲講啲億萬「超人」，本來話係「三頭六臂」，眉精眼企嘅萬能博士，條數就預咗俾好多銀両，但係就鬼影都唔見隻個地盤仲好似「雜架攤」，亂七八糟。負責管理嘅「老爺」好似選擇性「失明」。

點解大拿拿百幾億嘅「坡蓆」會亂籠得咁交關？係咪啲老爺奉旨「倒水」夾集體「昏迷」？一啲都唔知？七年來合作造出套「濠江混賬大鬧劇」？若果咁「不幸」真係講中，呢套「世紀摸水大鬧劇」，成本真係仲貴個「賓墟」！

人們不禁會問，呢套「倒水大鬧劇」由籌拍到上 演，正好係「陽光祠堂」哎得最響果陣，本來「演」出來嘅效果應該好「陽光」至啱，點解中場睇番上去，偏偏就咁多黑幕重重？有口痕友就發牙痕，唔知係咪個太上皇導演要的茄喱啡咁做，啲茄喱啡就按「本子辦事囉」！若果劇本前題係咁，就難怪戲軌會演到今日咁嘅亂七八糟景況。

唉，最難為嘅就係，面對呢套咁烏龍、離奇、亂七八糟嘅黑幕重重「鉅片」，要由櫈都未坐熱既半唐番場記嚟「解話」，你話幾咁悲情，所以，雖然唔知幾時至做完，肯定呢套係重金、奇情大悲劇！

　‧阿茂‧